Glaube und Leben

Himmelfohrt, de Vadderdag vun Jesus un uns Buuknavel

De Himmelfohrt vun Jesus – in uns Kark ward nu wedder fieert, dat wie en Gott hebbt, de grötter is as wi uns dat vörstelln künnt un de bannig veel Vertruun in uns sett. Un dat kümmt so: Jesus hett sein Frünn torüch loten müss jüss wiel he sien „Vadderdags-Tour“ anfungen hett. Un disse „tour“ to sien Vadder, de is bannig wichtig! Wat? Wat kann doran wichtig ween, dat he uns alleen torüch laaten deit? Wi mööt torüchbleven – dat meen, vun nu an hebbt wi all dat in uns sülben wat wi vörher buten in de Person vun Jesus funnen hebbt. He dä jo to de Minschen wannern un er vertelln dat Gott sien Riek vör de Döör steiht. Jesus is mehrnmang weest un hett de Lüüd Mood tosproken un ehr gesund makt. Wi in unse Tied mööt nu alleen graad stahn dorför, dat de Saak vun Jesus un unse Kark wiedergeiht. Wi ward sotoseggen düchtig, dat ganze Leven alleen torecht to kregen. So as dat domols glieks an Anfang weer mit uns eegen navelstripp. Man erst nodem de stripp afgniedelt weer hebbt wi ganz alleen wassen künnt.

Villicht mööt wi uns mol frogen, wat uns Buuknavel nu mit Himmelfohrt to dohn hett. De beiden wiest uns, dat wi in uns Leven towielen ok mal wat lootlaaten müss, bevör wi denn ut eegen Kraff wassen köönt an Lief un Seel. Wi mööt sülben op uns kieken un uns hölpen un een den annern Mood maaken to’n Leven. Laat uns an Vadderdag mal doran denken, dat Jesus un sien Vadder soveel Vertruuen in uns sett hett, dat wi dat all tohoop ok hinkreegt. Himmelfohrt is Vadderdag, kannst moken, wat du willst. Lees mol nah in de Bibel, Apostelgeschicht, glieks an Anfang.

Pastor Robert Pfeifer